Is this site a blessing to you?



Results

Akahurikano aku tugira ku tuba tuteebembeize Ruhanga

Yeremia 2:1-37.

Emigane eshatu niyo erikworekwa omu kitabo kya nabi Yeremia.

Omugane gw’okubanza gurimu omutsigazi orikwetwa Yeremia. Yeremia n’omuntu ou Ruhanga yaatooraine kukora omurimo gugangaire munonga.
Omugane gwa kabiri gurimu abantu abu Ruhanga yaatooraine, Israeli. Ahanyima y’emyaka mingi y’obwebembezi butarimu kutiina Ruhanga n’okuramya ebishushani, Ruhanga akaba yaatamirwe. Akaheereza Yeremia omurimo gw’okuragura amakuru mabi ngu abantu abo nibaija kucwekyerezibwa aba Babulooni.
Omugane gwa kashatu gurimu Ruhanga we wenka.Omuzaire ocwekire omutima ahabw’okureeba abaana be nibagaruka enyima bakaza omu bugomi.

Ruhanga ku arikuba atabaire w’okubanza omu magara gaitu nituba turi ab’okweshanga omu naku y’amaani. Akahurikano aku orikugira waaba oteebeembeize Ruhanga.
Eki nikyo kyabaire aha batoorainwe ba Mukama,Ab’Israeli. Bakatandika kujwanga n’amahanga agandi hamwe na ba Ruhanga baabo. Baatandika kushwererana n’abantu abandi abatari b’enyikiriza y’Ekiyudaaya. Eki baateekateekire omu kutandika ngu nibaija kukumiirira kyaba nikyo kyabakumiirira.

1.    Okwehanangiriza kw’okubanza - ku orikukuratira ekintu ekindi ekitari kya Ruhanga, nooba nooterera orikuza omu kuhwerekyerera.
Yeremia akahendera naayoreka n’amaani akabi ka Israeli ati:
Haza waaramiza aha mutwe gwa buri kibungo kiraingwa n’ahansi ya buri kiti kibisi ekyetwa omurinzi, nka maraaya. (Yeremia 2:20b).

Ahabwa Israeli yo’ obunyatsi bukaba buba buri burungi munonga ow’abandi. Kikaba kitatwara mwanya muraingwa, obashanga aha rubaju orundi barikuramya ebishushani na babaali.Bakookyeza ruhanga w’enduga mahanga moleki abaana baabo omu muriro. Omu runyiriri 28 nirugira ngu bakaba baine ba ruhanga baingi nk’oku endembo zaabo zabaire nizaingana. Bakaba bakora eby’obuhemu omu by’obushambani byabo,bakaba bataine mazima omu by’obushuubuzi bwabo. Ruhanga yaagira ati, ekyo nikiimara. Omu kutandika okaba nooshusha oti tikiine kabi. Nk’omwana gw’empiri. Ahanyima gukaruma. Kandi okeshanga omu kabi k’amaani.
Okukuratira ekintu ekindi okukira ekya Ruhanga nooba ori
Aharikuterera orikuza omu kuhwerekyerera.

2.    Okwehanangiriza kwa kabiri - Okukuratira abeebembezi batarikutiina Ruhanga nikirugamu entuura y’okutatiina Ruhanga.
Eki buzimazima nikyo Israeli yaakozire. Bakagumisiririza abeebembezi abatarikutiina Ruhanga omu myanya eyaabaire neeyetenga okutiina Ruhanga. ‘Abanyamurwa tibaagira bati: Beitu Mukama arahi? N’abanyabiragiro tibammanya, abategyeki baancumuraho. Na baanabi baaragura ebya Baali, baakuratira ebitaine muhoho.’ (Yeremia 2:8).
Israeli rikaba riri eihanga ahi abeebembezi b’ediini baabaire batasherura Ruhanga. Abacwi b’emanja bakaba batamanya Ruhanga nari ebi arikwenda. Abagabe bakagomera Ruhanga kandi baayeyombekyera obugabe okukira obwa Ruhanga. Ababuurizi bakabuurira enyegyesa ya Baali okukira ekigambo kya Ruhanga. Ku turikutandika kukuratira abeebembezi abatarikutiina Ruhanga,tikiri kutwara mwanya muraingwa tutakakuratiire entwaza yaabo.
3.    Okwehanangiriza kwa kashatu - Okweta omu mwanya gwa Ruhanga nikimanyisa okweta omu mwanya gw’okugwa.

Israeli ekacwamu ngu emihanda yaabo ekaba eri mirungi okukira eya Ruhanga: ‘Ahabw’okuba abantu bangye bakozire ebibi bibiri-baanyimwire,nyowe enshuro y’amaizi g’amagara, baayetimbira ebiziba, ebiziba bifumukire, ebitarikubaasa kurugwamu maizi.’ (Yeremia 2:13).

Israeli ekaba n’eza kugira amaizi marungi g’enshuro agarikusheneneka, kwonka bo bakaba gye n’amaizi gaterami, mabi agarikuruga omu kiziba kifumukire. Israeli ekenda ngu etoore omuhanda ogwayo kandi n’okukora ebyabo.

Okweta omu mwanya gwa Ruhanga nikimanyisa okweta omu  mwanya gw’okugwa.

4.    Okwehanangiriza kwa kana - Okwanga kweteisa nikireeta omutima gw’obugangaazi.

Israeli ekanga kwemera ngu eri omu nshobi kandi eketeisa obubi bwayo. Ekyarugiremu, emitima yaabo ekagangazibwa kandi baagumizamu kutuura omu bugomi. Bwanyima Ruhanga akaba naaza kumaraho eihanga ahabw’okuba bakanga kumugarukira.

‘Ahabw’okuba banteire amabega,baanyima amaisho.’ (Yeremia 2:27b).
Mbwenu obubi bwabo bukazaaruukamu ki? Omu shuura 37 neetugambira ngu Ruhanga akaikiriza abategyeki kuruga omu ihanga erya Babulooni okutaahirira Yerusaalemu.
Bakeehinguririza orurembo, baarugota na bwanyima baarutaahamu, ahabw’obugomi bwe, omugabe wa Yuda akakwatwa. Akareeba okwitwa kw’abaana be. Baamwihamu amaisho kandi baamubohesa orujegyere omu kihome okumara ebiro by’amagara ge goona. Ekikaari ky’omugabe omuri Yerusaalemu kikookibwa kyahwaho,emisiri baagishiisha kandi n’amaka goona gaasheenyagurwa. Abantu baingi bakatwarwa omu bukwatwa omuri Babulooni kandi baahindurwa abahuuku.

5.    Okwehanangiriza kwa kataano - Ekibi kiine ebiri kukizaaruukamu.


Nihabaasa kutaba hati, nari esabiiti erikukurataho, kwonka nabwo ekibi kiine ebiri kukizaaruukamu.

‘Omanye kandi oreebe ku kiri ekintu kibi kandi kirikushaarira, kuunyimura nyowe Mukama Ruhanga waawe otantiine.’ (Yeremia 2:19b).

Nitubaasa kuteekateeka ngu ahabw’okuba tihariho ohikiriire n’omwe kandi twena twine endwara egi ei Baibuli eyeta ekibi ngu kandi ahabw’okuba Ruhanga ni Ruhanga wa rukundo, ngu n’ahabw’ekyo tikiine nshonga munonga. Enshobi ezitaine maani
naija kuzirenzya amaisho. Eky’obusaasi, ekora egumire n’okukira aho. N’obu Ruhanga arikutukunda n’esaasi nyingi, okwera kwe n’amazima ge biri ngu tarikubaasa kutuura na kibi. Nk’oku baanabi Habakuuki n’Isaaya baakigambire ngu ‘Iwe ow’amaisho gashemeire, agatenda kureeba kibi, kandi agatarikwemera kureeba bitahikire.’ (Habakuuki 1:13).
‘Kureka eby’okutahikiirira byanyu, nibyo bibataaniise na Ruhanga waanyu, n’ebibi byanyu nibyo bimureeteire kubaima amaisho.’ (Isaaya 59:2).

Dr. Czeslaw Bassara ( This e-mail address is being protected from spambots. You need JavaScript enabled to view it ; www.proword.eu)

James N. Spurgeon akahandiika ati:

“Omurimo guri aha kucwamu kwawe; obuheereza buri aha kwetwa Kristo, Omu murimo n’oba noomanya ngu nooyakiira; omu buheereza noogarura ekyo ekibaire kyakuhairwe, Omurimo nigurugiirira aha kubaasa kwawe; obuheereza niburugiirira aha kubaho kwawe ahari Ruhanga. Omurimo ogukozirwe gye nigukuhimbisisa; Obuheereza obukozirwe gye nibureetera Kristo ekitiinisa.”

Obuheereza obu n’obw’okureetera Mukama waitu kandi omujuni Yesu Kristo ekitiinisa!