Is this site a blessing to you?



Results

Ka tuhangye Mukama waitu Yesu amaisho

Amaisho gaitu ka tugahangye Yesu, owaatandikire okwikiriza kwaitu kandi omuhikiiriza waakwo; ogwo owaayemeire omusharaba ahabw’okushemererwa okwatairweho omu maisho ge, akagaya enshoni zaagwo, kandi hati ashutami aha rubanja rwa buryo rw’ekitebe ky’obukama bwa Ruhanga.
Muteekateekye ahari ogwo owaagumisiririize okwangwa kutyo oku abasiisi baamwangire, murekye kuruha n’okugwa enshanzi omu mitima yaanyu (Heb. 12:2-3).
Ku turikuba tutateireho ntwaza  omu magara gaitu, abantu abandi n’ebiriho nibiija kugituteeraho.  Ekyo ku kirikubaho okushoberwa n’okwehwa amatsiko nibibaasa kuturugiramu akabi.

1. Mukama waitu Yesu akaba naamanya ekigyendererwa kye.
Yesu yaamugira ati: “Eri izooba okujunwa kwataaha omunju egi, ahakuba ogu nawe n’omwana wa Abrahamu; kandi omwana w’omuntu akaija kusherura n’okujuna ekyabuzire” (Luka 19:9-10).
Mumanye ngu Ruhanga taratumire Mwana we omu nsi kugicwera orubanja, kureka ngu ensi ejunwe ahabwe.
Orikumwikiriza, tarikucwerwa rubanja; kwonka otarikumwikiriza, aherize kurucwerwa, ahabw’okuba taikiriize iziina ry’Omwana wa Ruhanga omwe nyamunegyere.
Omuri Luka 15:1-11 nitureeba ebintu ebyabaire bibuzire
-    Entaama ekabura ahabwebihikirizi bya butoosha.
-    Empiiha zikabura kitaraariire
-    Omwana owaarazire akabura akigyendereire.
-    Tushemereire kumanya ekigyendererwa kyaitu tutakateireho enaama.

2. Mukama waitu Yesu akakora enaama ezegamiire ekigyendererwa kye.
Enaama y’okubanza.
Okukwatanisa n’Ishe.
Aha kiro ekindi Yesu akaimuka bukiri nyekiro, yaashohora yaaza omu mwanya ogwekiikire, yaashabirayo.  Simooni na bagyenzi be baamukurata.  Ku baamuboine, baamugira  bati; Abantu boona nibakusherura ! Yesu yaabagarukamu ati:
Tugyende ahandi omutauni eziri haihi, nayo mbuurireyo; ahakuba nikyo naizire (Mako 1:35-38)
Enaama y’akabiri.
Okutendeka ebeegi abu yaabaire aine.
Bakaba bari omu muhanda nibainamuka Yerusaalemu bari na Yesu abeebembeire, abeegi be baatangaara, nabaabaire bamukuratiire batiina.  Yaagaruka yaayekiikana bari ikumi na babiri, yaatandika kubagambira ebirikwija kumubaho. (Mako 10:32).
Enaama ya kashatu.
Okusherura ababuzire.
Kandi omwana w’omuntu akaija kusherura n’okujuna ekyabuzire. (Luka 19:10).

3. Yesu akaba arinda enaama ze enteekateeka z’abantu abandi.

Okuruga aho Yesu yaatandika kumanyisa abeegi be oku ashemereire kuza Yerusaalemu, akabonabonesibwa omuri bingi abakuru n’abanyamurwa, abakuru n’abahandiiki, akaitwa kandi bwanyima y’ebiro bishatu akazooka.

Petero yaamuta aharubaju yaatandika kumuteisa, naamugira ati: Nikikabure, Mukama wangye! Ekyo tikirikwija kukubaho na kakye.

Yesu yaahinduka, yaagira Petero ati: Garuka enyima yangye, sitaane! Waambeera enkongi ahabw’okuba torikuteekateeka bya Ruhanga, kureka eby’abantu’’ (Matayo 16: 21: 23).
Yesu akaba naamanya ekigyendererwa kye!

1.    Mukama waitu Yesu akakora enaama zeegamiire ekigyendererwa kye
2.    Mukama waitu Yesu akaba arinda enaama ze enteekateeka z’abantu abandi.
3.    Ka tuhangye Mukama waitu Yesu amaisho!

Ka tuhangye Mukama waitu Yesu amaisho

James N. Spurgeon akahandiika ati:

“Omurimo guri aha kucwamu kwawe; obuheereza buri aha kwetwa Kristo, Omu murimo n’oba noomanya ngu nooyakiira; omu buheereza noogarura ekyo ekibaire kyakuhairwe, Omurimo nigurugiirira aha kubaasa kwawe; obuheereza niburugiirira aha kubaho kwawe ahari Ruhanga. Omurimo ogukozirwe gye nigukuhimbisisa; Obuheereza obukozirwe gye nibureetera Kristo ekitiinisa.”

Obuheereza obu n’obw’okureetera Mukama waitu kandi omujuni Yesu Kristo ekitiinisa!